Tuesday, 21 November 2017 5.36 PM IST
ഗൗതം മേനോൻ മലയാളത്തിൽ
November 14, 2017, 11:50 am
മികച്ച ചിത്രങ്ങൾ പ്രേക്ഷകർക്കു സമ്മാനിച്ച സംവിധായകൻ ഗൗതം മേനോൻ മലയാള സിനിമയിലേക്ക് ചുവടു വച്ചു. സംവിധായകനായല്ല, അഭിനേതാവായാണ് ഗൗതം മലയാളത്തിലെത്തിയത്. നവാഗതനായ ജോഷി തോമസ് പള്ളികൾ സംവിധാനം ചെയ്ത നാം എന്ന ക്യാമ്പസ് ഫിലിമിൽ ആണ് ഗൗതം വാസുദേവ് മേനോൻ അഭിനയിച്ചത്. പൂർണമായും ക്യാമ്പസിനെ ചുറ്റിപറ്റിയുള്ള പ്രമേയമാണിത്. ഒരു യഥാർത്ഥ സംഭവ കഥയെ ആസ്പദമാക്കി എടുത്ത ചിത്രത്തിൽ വിദ്യാർത്ഥി സംഘത്തെ നിർണായക ഘട്ടത്തിൽ സഹായിക്കുന്ന ആളായാണ് ഗൗതം വേഷമിട്ടിരിക്കുന്നത്. കഥാപാത്രത്തിന്റെ പേര് പുറത്തുവിട്ടിട്ടില്ല. താൻ മലയാള സിനിമയിൽ അഭിനയിക്കുന്ന വിവരം ഗൗതം മേനോൻ തന്നെ ഒഫീഷ്യൽ ആയി കൊച്ചിയിൽ നടന്ന ചിത്രത്തിന്റെ ഓഡിയോ ലോഞ്ചിനിടെ പുറത്തു വിടുകയും ചെയ്തു.

ശബരീഷ് വർമ്മ, രാഹുൽ മാധവ്, അദിതി രവി, ഗായത്രി സുരേഷ്, മറീന മൈക്കിൾ, രഞ്ജി പണിക്കർ, ടോണി ലുക്ക് തുടങ്ങി വൻ താരനിര തന്നെ ചിത്രത്തിലുണ്ട്. ഇതിനു മുൻപ് ഒരു മലയാള ചിത്രത്തിൽ ഗൗതം മേനോൻ അഭിനയിക്കുന്നു എന്ന് വാർത്ത വന്നിരുന്നു. നിവിൻ പോളിയെ നായകനാക്കി വിനീത് ശ്രീനിവാസൻ ഒരുക്കിയ ജേക്കബിന്റെ സ്വർഗരാജ്യത്തിലാണ് ഗൗതം മേനോൻ അഭിനയിക്കാൻ കരാറായത്. എന്നാൽ, ചെന്നൈയിലെ പ്രളയത്തെത്തുടർന്ന് ഗൗതം ഷൂട്ടിംഗിനായുള്ള വിദേശ യാത്ര റദ്ദ് ചെയ്യുകയായിരുന്നു.

ഇതാദ്യമായല്ല
മലയാള സിനിമയിൽ ആദ്യമായാണെങ്കിലും തമിഴിൽ 13 ഓളം ചിത്രങ്ങളിൽ വലുതും ചെറുതുമായ കഥാപാത്രങ്ങളെ ഗൗതം അവതരിപ്പിച്ചിട്ടുണ്ട്. 1997ൽ മിൻസാരക്കനവ് എന്ന ചിത്രത്തിലൂടെയാണ് ഗൗതം നടനായത്. തുടർന്ന് മിന്നലേ, കാക്ക കാക്ക, വേട്ടയാട് വിളയാട്, പച്ചൈക്കിളി മുത്തുച്ചരം, വാരണം ആയിരം, വിണ്ണൈത്താണ്ടി വരുവായ തുടങ്ങി നിരവധി ചിത്രങ്ങളിൽ അഭിനേതാവായി തിളങ്ങി. താൻ സംവിധാനം ചെയ്യാത്ത കണ്ണാ ലഡു തിന്ന ആസയാ, പവർ പാണ്ടി, ഒരു നാൾ ഇരവിൽ തുടങ്ങിയ ചിത്രങ്ങളിലും ഗൗതം അഭിനയിച്ചിട്ടുണ്ട്. വിക്രം നായകനായ ധ്രുവ നചത്തിരം എന്ന ചിത്രമാണ് ഗൗതം മേനോന്റേതായി പുറത്തുവരാനുള്ളത്. ഒരു സ്‌പൈ ത്രില്ലർ ആയി നിർമ്മിച്ചിരിക്കുന്ന ഈ ചിത്രം അടുത്ത വർഷം റിലീസ് ചെയ്യും.
 PRINT THIS PAGE
യു ട്യൂബിൽ അപ്‌ലോഡ്‌ ചെയ്യുന്ന വീഡിയോസ് നിങ്ങളുടെ മെയിലിൽ ലഭിക്കുവാൻ കൗമുദി ടിവി ഒഫിഷ്യൽ യു ട്യുബ് ചാനൽ സബ്സ്ക്രൈബ് ചെയ്യുക.
ഇവിടെ കൊടുക്കുന്ന അഭിപ്രായങ്ങൾ കേരള കൗമുദിയുടെതല്ല. സോഷ്യൽ നെറ്റ്‌വർക്ക് വഴി ചർച്ചയിൽ പങ്കെടുക്കുന്നവർ അശ്ലീലമോ അസഭ്യമോ തെറ്റിദ്ധാരണാജനകമോ അപകീർത്തികരമോ നിയമവിരുദ്ധമോ ആയ അഭിപ്രായങ്ങൾ പോസ്റ്റ്‌ ചെയുന്നത് സൈബർ നിയമപ്രകാരം ശിക്ഷാർഹമാണ്.
കൂടുതൽ വാർത്തകൾ