Wednesday, 20 September 2017 8.17 PM IST
വ്യാജ വിവാഹരേഖ ചമച്ച് സ്വത്ത് തട്ടിയ കേസ്:അഭിഭാഷകയും ഭർത്താവും കീഴടങ്ങി
August 19, 2017, 12:10 am
പ്രത്യേക ലേഖകൻ
തളിപ്പറമ്പ് (കണ്ണൂർ): ദുരൂഹസാഹചര്യത്തിൽ മരിച്ച റിട്ട. സഹകരണ ഡെപ്യൂട്ടി രജിസ്ട്രാർ പുതുക്കുളങ്ങര ബാലകൃഷ്ണന്റെ കോടികളുടെ സ്വത്ത് തട്ടിയെന്ന കേസിൽ മുഖ്യപ്രതികളായ പയ്യന്നൂർ ബാറിലെ അഭിഭാഷക കെ.വി. ശൈലജയും ഭർത്താവ് പി. കൃഷ്ണകുമാറും കീഴടങ്ങി. ഇവരുടെ മുൻകൂർ ജാമ്യാപേക്ഷ കഴിഞ്ഞ ദിവസം ഹൈക്കോടതി തള്ളിയിരുന്നു. ഇന്നലെ രാവിലെ പത്തിനാണ് തളിപ്പറമ്പ് ഡിവൈ. എസ്. പി കെ.വി. വേണുഗോപാൽ മുമ്പാകെ ഇരുവരും കീഴടങ്ങിയത്. വിശദമായ ചോദ്യം ചെയ്യലിനു ശേഷം ഇവരെ ഇന്ന് പയ്യന്നൂർ ജുഡിഷ്യൽ ഫസ്റ്റ് ക്ലാസ് മജിസ്‌ട്രേട്ട് കോടതിയിൽ ഹാജരാക്കും. കേസിൽ പ്രതികൾക്ക് വ്യക്തമായ പങ്കുണ്ടെന്നും വിവാഹ സർട്ടിഫിക്കറ്റ് വ്യാജമാണെന്നും മുൻകൂർ ജാമ്യഹർജി പരിഗണിക്കവെ പ്രോസിക്യൂട്ടർ ഹൈക്കോടതിയിൽ ബോധിപ്പിച്ചിരുന്നു. ബാലകൃഷ്ണന്റെ മരണത്തിൽ സംശയമുണ്ടെന്നിരിക്കെ പ്രതികൾക്ക് ജാമ്യം നൽകുന്നത് അന്വേഷണത്തെ പ്രതികൂലമായി ബാധിക്കമെന്ന പ്രോസിക്യൂഷന്റെ വാദം കോടതി അംഗീകരിക്കുകയായിരുന്നു.
കേസിലെ മറ്റൊരു പ്രതിയും ശൈലജയുടെ സഹോദരിയുമായ ജാനകി നേരത്തെ പൊലീസിൽ കീഴടങ്ങിയിരുന്നു.
നാട്ടുകാരുടെ കർമ്മസമിതി പരാതിയുമായി പൊലീസിനെ സമീപിച്ചതോടെയാണ് ലോയേഴ്സ് കോൺഗ്രസ് നേതാവായിരുന്ന അഡ്വ.കെ.വി. ശൈലജയും ഭർത്താവ് കൃഷ്ണകുമാറും ചേർന്നുള്ള തട്ടിപ്പ് പുറത്തായത്. അതോടെ ഇരുവരും ഒളിവിൽ മുങ്ങുകയായിരുന്നു. ബാലകൃഷ്ണന് അഞ്ഞൂറു കോടിയോളം രൂപ മതിപ്പു വില വരുന്ന സ്വത്തുക്കളുണ്ടെന്നു മനസിലാക്കിയ അഡ്വ.ശൈലജ തന്റെ സഹോദരി ജാനകി അദ്ദേഹത്തെ വിവാഹം കഴിച്ചിരുന്നതായി വ്യാജരേഖ ചമച്ച് സ്വത്ത് തട്ടിയെടുത്തെന്നാണ് കേസ്. 2011ൽ രോഗബാധിതനായി തിരുവനന്തപുരത്ത് ആശുപത്രിയിൽ പ്രവേശിപ്പിക്കപ്പെട്ട ബാലകൃഷ്ണനെ ശൈലജയും ഭർത്താവും ചേർന്ന് വിദഗ്ദചികിത്സയ്ക്കെന്ന് പറഞ്ഞ് നിർബന്ധപൂർവം ഡിസ്ചാർജ് ചെയ്യിക്കുകയായിരുന്നു. കോഴിക്കോട്ടേക്ക് കൊണ്ടുവരുന്നതിനിടെയായിരുന്നു മരണം. കൊടുങ്ങല്ലൂരിലെ സ്വകാര്യ ആശുപത്രിയിൽ എത്തിച്ചപ്പോൾ അന്ത്യം സംഭവിച്ചതായി ആശുപത്രി അധികൃതർ അറിയിച്ചു. ബന്ധുക്കളാണെന്ന് ധരിപ്പിച്ച് മൃതദേഹം ഏറ്റുവാങ്ങിയ ഇരുവരും ഷൊർണൂരിലെ ശാന്തിതീരത്താണ് സംസ്‌കാരം നടത്തിയത്.
പിന്നീട് നാട്ടിലെത്തിയ ശേഷം ജാനകി 1980 ൽ തന്നെ ബാലകൃഷ്ണനെ വിവാഹം കഴിച്ചിരുന്നതായി വ്യാജരേഖയുണ്ടാക്കി. വിവാഹ ക്ഷണക്കത്തും ഫോട്ടോയുമെല്ലാം വ്യാജമായി സൃഷ്ടിച്ചിരുന്നു. തുടർന്ന് തിരുവനന്തുപരത്തുണ്ടായിരുന്ന ബാലകൃഷ്ണന്റെ സ്വത്തുക്കൾ സഹോദരി ജാനകിയുടെ പേരിലേക്കും പിന്നീട് അഭിഭാഷകയുടെ പേരിലേക്കും മാറ്റിയതായും പൊലീസ് കണ്ടെത്തി. ഇതൊന്നും താൻ അറിഞ്ഞിരുന്നില്ലെന്നും ബാലകൃഷ്ണനെ കാണുകയോ വിവാഹം കഴിക്കുകയോ ചെയ്തിട്ടില്ലെന്നും ജാനകി പൊലീസിന് മൊഴി നൽകിയിരുന്നു. പെൻഷനു വേണ്ടിയാണെന്നു പറഞ്ഞ് സഹോദരി കുറേ രേഖകളിൽ ഒപ്പിടുവിച്ചിട്ടുണ്ടെന്നും ജാനകി പറഞ്ഞു.
വ്യാജവിവാഹരേഖയുടെ ബലത്തിലാണ് ഭൂസ്വത്തുക്കളടക്കം അഡ്വ. ശൈലജയും ഭർത്താവും കൈവശപ്പെടുത്തിയത്. 'വിധവ'യെന്ന നിലയിൽ ജാനകിയ്ക്ക് അവകാശപ്പെട്ട പരിയാരം അമ്മാനപ്പാറയിലെ 16 ഏക്കർ സ്ഥലത്ത് 'ഭർതൃ' സഹോദരൻ രമേശൻ അതിക്രമിച്ചുകയറിയെന്നു കാണിച്ച് അഡ്വ. ശൈലജ സഹോദരിയ്ക്ക് വേണ്ടി പൊലീസിൽ പരാതി കൊടുത്ത സംഭവവുമുണ്ടായിരുന്നു.




 
 PRINT THIS PAGE
യു ട്യൂബിൽ അപ്‌ലോഡ്‌ ചെയ്യുന്ന വീഡിയോസ് നിങ്ങളുടെ മെയിലിൽ ലഭിക്കുവാൻ കൗമുദി ടിവി ഒഫിഷ്യൽ യു ട്യുബ് ചാനൽ സബ്സ്ക്രൈബ് ചെയ്യുക.
ഇവിടെ കൊടുക്കുന്ന അഭിപ്രായങ്ങൾ കേരള കൗമുദിയുടെതല്ല. സോഷ്യൽ നെറ്റ്‌വർക്ക് വഴി ചർച്ചയിൽ പങ്കെടുക്കുന്നവർ അശ്ലീലമോ അസഭ്യമോ തെറ്റിദ്ധാരണാജനകമോ അപകീർത്തികരമോ നിയമവിരുദ്ധമോ ആയ അഭിപ്രായങ്ങൾ പോസ്റ്റ്‌ ചെയുന്നത് സൈബർ നിയമപ്രകാരം ശിക്ഷാർഹമാണ്.
കൂടുതൽ വാർത്തകൾ