ടിവികെ സഖ്യത്തിൽ ഡിഎംകെയുടെ ഉറ്റ ചങ്ങാതികളും; ഭരണത്തിൽ വിജയ്‌ക്ക് കടമ്പകളേറെ

ചെന്നൈ: തമിഴ്‌നാട്ടിൽ ചരിത്രം കുറിച്ചുകൊണ്ട് ടിവികെ മേധാവിയും നടനുമായ വിജയ് മുഖ്യമന്ത്രിയായി സത്യപ്രതിജ്ഞ ചെയ്‌‌തുകഴിഞ്ഞു. ഇനി ടിവികെയ്‌ക്ക് മുന്നിലുള്ള കടമ്പ സംസ്ഥാനനിയസഭയിൽ ഭൂരിപക്ഷം തെളിയിക്കുകയെന്നതാണ്. വിസികെയിൽ നിന്നും ലീഗിൽ നിന്നും രണ്ട് എംഎൽഎമാർ വീതം നൽകുന്ന പിന്തുണ ടിവികെയ്‌ക്ക് ഭരണം ഉറപ്പിക്കാനുള്ള അംഗസംഖ്യ ബലപ്പെടുത്തുന്നു. ടിവികെയുടെ പ്രധാന എതിരാളികളായ ഡിഎംകെയുമായുള്ള എല്ലാ ബന്ധങ്ങളും അവസാനിപ്പിക്കാതെയാണ് ഇവർ വിജയ്‌യെ പിന്തുണയ്‌ക്കുന്നത്. നിലവിലെ തമിഴ്‌നാട് രാഷ്‌ട്രീയത്തിലെ ഏറ്റവും കൗതുകകരമായ കാര്യവും അതുതന്നെ.

വാ‌സ്‌തവത്തിൽ ഡിഎംകെ നയിക്കുന്ന സഖ്യത്തിനൊപ്പമാണ് തങ്ങളെന്ന് വിസികെ രേഖാമൂലം പറഞ്ഞിട്ടുണ്ട്. സംസ്ഥാനത്ത് ഭരണഘടനാപ്രതിസ ന്ധിയോ രാഷ്‌ട്രപതിഭരണമോ ആഗ്രഹിക്കാത്തതിനാലാണ് വിജയിയെ പിന്തുണയ്‌ക്കുന്നതെന്നും അവർ വ്യക്തമാക്കിയിരുന്നു. ഇന്നലെ മുൻ മുഖ്യമന്ത്രി എംകെ സ്റ്റാലിനെ കണ്ട് ടിവികെയെ പിന്തുണയ്‌ക്കാനുള്ള തീരുമാനം അറിയിച്ചെ ങ്കിലും അദ്ദേഹം തങ്ങളെ തടഞ്ഞില്ലെന്നാണ് വിസികെ മേധാവി തോൾ തിരുമാളവൻ പ്രതികരിച്ചത്.

വ്യക്തമായി പറഞ്ഞാൽ, ടിവികെയ്ക്ക് ഇപ്പോൾ 120 എംഎൽഎമാരുടെ പിന്തുണയുണ്ട് (ടിവികെ 107, കോൺഗ്രസ് 5, ഇടതുപക്ഷം 4, വിസികെ, ഐയുഎംഎൽ 2 വീതം). ടിവികെയെ പുറത്തു നിർത്താൻ ഡിഎംകെയും എഐഎഡിഎംകെയും നടത്തുന്ന പരീക്ഷണങ്ങളുടെ ഭാഗമാകാൻ ഇടതുപക്ഷം വിസമ്മതിച്ചിരുന്നു. കോൺഗ്രസിനെ സംബന്ധിച്ച് ഡിഎംകെയുമായുള്ള എല്ലാ ബന്ധങ്ങളും സ്വമേധയാ അവസാനിപ്പിച്ച ശേഷമാണ് അവർ ടിവികെയെ പിന്തുണച്ചത്.

പ്രധാന എതിർകക്ഷിയായ ഡിഎംകെയുടെ അടുത്ത മിത്രങ്ങളെ കൂട്ടുപിടിച്ച് വിജയ് ഭരണം തുടങ്ങുന്നത് തീക്കൊള്ളികൊണ്ട് തലചൊറിയുന്നതിന് തുല്യമാണെന്ന് പലരും വിലയിരുത്തുന്നു. എഐഎഡിഎംകെയുമായി സഖ്യമുണ്ടാക്കി ടിവികെയെ പുറത്തുനിർത്താനുള്ള പരീക്ഷണത്തിൽ ഡിഎംകെ വിജയിക്കാത്തതിന്റെ ഒരേയൊരു കാരണം പാർട്ടിയിലെ വലിയൊരു വിഭാഗം ശക്തമായി പിന്നോട്ട് പോയതാണ്. ആ ശ്രമം പരാജയപ്പെട്ടതിനുശേഷം മാത്രമാണ് ഇടതുപക്ഷവും മറ്റുള്ളവരും ടിവികെയെ പിന്തുണച്ചത്.

സംസ്ഥാന നിയമസഭയിലെ മൂന്നാമത്തെ വലിയ കക്ഷിയായ 47 സീറ്റുകളുള്ള എഐഎഡിഎംകെയും 59 എംഎൽഎമാരുള്ള രണ്ടാമത്തെ വലിയ കക്ഷിയായ ഡിഎംകെയും ടിവികെയെ പുറത്താക്കാൻ ഒരുമിച്ച് പ്രവർത്തിക്കാൻ തയ്യാറാണെന്ന് ഇത് വ്യക്തമായി കാണിക്കുന്നു. എന്നിരുന്നാലും നിലവിലെ സാഹചര്യത്തിൽ പൊതുജനവികാരവും ജനവിധിയും ടിവികെയ്ക്ക് അനുകൂലമായതിനാൽ ടിവികെയെ ഭരണത്തിൽ നിന്ന് തടയാനുള്ള ഏതൊരു പരീക്ഷണവും തിരിച്ചടിക്കും.