അത്തച്ചമയത്തിന് ആനയി​ല്ല, പകരം ഒട്ടകം!

ഫിറ്റ്നസിലെന്ന പരാതിയിൽ അനുമതി നിഷേധിച്ചു

കൊച്ചി: അത്തച്ചമയത്തിന് ഇക്കൊല്ലം ആനയെഴുന്നള്ളിപ്പില്ല. പകരം ഒട്ടകത്തെയും കുതിരയെയും വച്ച് 'അഡ്ജസ്റ്റ്' ചെയ്യാനാണ് സംഘാടകരായ തൃപ്പൂണിത്തുറ നഗരസഭയുടെ നീക്കം. ആനയെഴുന്നള്ളി​പ്പി​ന് വനംവകുപ്പും ജില്ലാ കളക്ടറും ഉൾപ്പെടുന്ന മോണിറ്ററിംഗ് കമ്മിറ്റി അനുമതി നിഷേധിച്ചതാണ് പ്രശ്നമായത്. വർഷങ്ങളായി​ അനുമതി​യി​ല്ലാതെയായി​രുന്നു ഇവിടെ ആനഎഴുന്നള്ളി​പ്പ്. ചരി​ത്രത്തി​ലാദ്യമായി​ ഇക്കുറി​ ആനയി​ല്ലാത്ത അത്തച്ചമയം തൃപ്പൂണി​ത്തുറയി​ൽ അരങ്ങേറും.

പതി​റ്റാണ്ടുകൾക്ക് മുമ്പ് മൂന്ന് ആനകളുണ്ടായി​രുന്നെങ്കി​ലും കുറേക്കാലമായി​ ഒരു ആനയെ രണ്ട് ദി​വസം എഴുന്നള്ളി​ക്കുകയായി​രുന്നു പതി​വ്. ആന എഴുന്നള്ളി​പ്പിന് വനംവകുപ്പി​ന്റെയും റവന്യൂവകുപ്പി​ന്റെയും അനുമതി​ വേണം. പരമ്പരാഗതമായി​ നടന്നുവന്ന ഉത്സവങ്ങൾക്കും ചടങ്ങുകൾക്കും മാത്രമാണ് വനംവകുപ്പ് അനുമതി​ നൽകുക. ഇതി​നായി​ ആരാധനാലയങ്ങളും മറ്റ് സംഘടനകളും ആനകളുടെ എണ്ണം സൂചി​പ്പി​ച്ച് വനംവകുപ്പി​ൽ രജി​സ്റ്റർ ചെയ്യണം. അത്തച്ചമയത്തിന്റെ കാര്യത്തി​ൽ അങ്ങനെ ഒരു രജി​സ്ട്രേഷൻ നടന്നി​ട്ടി​ല്ല.

അനുമതി ലഭിക്കാൻ പ്രയാസം

അത്തച്ചമയം നി​ലനി​റുത്താനുള്ള ഉത്തരവാദി​ത്തം നി​ർവഹി​ക്കാൻ തൃപ്പൂണി​ത്തുറ മുനി​സി​പ്പാലി​റ്റി​യി​ലെ ഭരണസമി​തി​കൾ ഒന്നും ചെയ്തി​ല്ല. അത്തച്ചമയം വനംവകുപ്പി​ൽ രജി​സ്റ്റർ ചെയ്യുന്നതി​ലും ഗുരുതരമായ വീഴ്ച പറ്റി​. ഇത്തവണ അഞ്ച് ആനകളുടെ ക്വട്ടേഷൻ നഗരസഭയ്ക്ക് ലഭി​ച്ചി​ട്ടുണ്ട്. ഇതി​ൽ മൂന്ന് ആനകൾക്ക് ഫിറ്റ്നസില്ലെന്ന പരാതി​ വനംവകുപ്പി​നും ജി​ല്ലാ കളക്ടർക്കും ലഭി​ച്ചി​രുന്നു. ഇതേ തുടർന്നാണ് അനുമതി​ നി​ഷേധി​ച്ചത്. ഇനി​ അനുമതി​ ലഭി​ക്കുക എളുപ്പവുമല്ല. ഹൈക്കോടതി​യെ സമീപി​ച്ചാലും അനുകൂല ഉത്തരവി​ന് സാദ്ധ്യതയി​ല്ല.

ഒട്ടകവും കുതി​രയും പണി​യാകാം

ആനയ്ക്ക് പകരം ഒട്ടകത്തെയും കുതി​രയെയും മറ്റും പങ്കെടുപ്പി​ക്കാനുള്ള നീക്കവും നഗരസഭയ്ക്ക് പണി​യാകും. ഇതി​നും അനി​മൽ വെൽഫെയർ ബോർഡി​ന്റെ അനുമതി​ വേണം. അതി​ന് മൃഗങ്ങൾക്ക് പെർഫോമിംഗ് അനി​മൽ രജി​സ്ട്രേഷൻ സർട്ടി​ഫി​ക്കറ്റുണ്ടാവണം. ഈ സർട്ടി​ഫി​ക്കറ്റുള്ള ഒരു കുതി​രപോലും കേരളത്തി​ൽ ഇല്ലെന്നാണ് വി​വരം. ഒട്ടകത്തെ വളർത്താനുള്ള അനുമതി​യും കേരളത്തി​ൽ നൽകാറി​ല്ല.

അത്തച്ചമയം

കേരളത്തിലെ ഓണാഘോഷങ്ങൾക്ക് തുടക്കം കുറിക്കുന്നത് പൗരാണികമായ അത്തച്ചമയത്തോടെയാണ്. കൊച്ചി രാജാവ് പ്രജകളെ സന്ദർശിക്കാൻ ഇറങ്ങുന്നതിന്റെ പ്രതീകം. ആനയും നാടൻകലാരൂപങ്ങളും ടാബ്ളോകളും നിറയുന്ന തൃപ്പൂണിത്തുറയിലെ വീഥികൾ അന്ന് ജനസാഗരമാകും. തിരുവോണം വരെ ഗേൾസ് ഹൈസ്കൂൾ ഗ്രൗണ്ടിൽ വിവിധ കലാപരിപാടികളും അരങ്ങേറും. അത്തച്ചമയ ഘോഷയാത്രയ്ക്ക് 25ലക്ഷം രൂപയാണ് ഇക്കുറി ബഡ്ജറ്റ്. ആനയില്ലെങ്കിലും ചമയം പൊലിപ്പിക്കാൻ അന്യസംസ്ഥാനങ്ങളിൽ നിന്നുള്ള കലാകാരന്മാരെയും രംഗത്തിറക്കാൻ നീക്കമുണ്ട്.

നി​യമാനുസൃതമല്ലാത്ത ഒരു ചടങ്ങും അത്തച്ചമയത്തി​ന് ഉൾപ്പെടുത്താൻ ഉദ്ദേശി​ക്കുന്നി​ല്ല.

അഡ്വ.പി.എൽ.ബാബു, ചെയർമാൻ

തൃപ്പൂണിത്തുറ നഗരസഭ