വയനാട്ടിൽ വിതുമ്പിക്കരച്ചിലും ആഹ്ലാദനൃത്തവും

കൽപ്പറ്റ: ബിഗ് സ്‌ക്രീനുകൾക്ക് മുൻപിൽ വിതുമ്പിക്കരച്ചിലും ആഹ്ലാദനൃത്തവും. ലോകകപ്പ് ഫുട്‌ബോൾ ഫൈനൽ മത്സരം തൽസമയം കാണുന്നതിന് കൽപ്പറ്റയിലൊരുക്കിയ വലിയ സ്‌ക്രീനുകൾക്ക് മുൻപിലായിരുന്നു ഇത്തരം കാഴ്ചകൾ. അർജന്റീനയെ പരാജയപ്പെടുത്തി സ്‌പെയിൻ ജേതാക്കളായതോടെ നേരം പുലരുവോളം ആഘോഷമായിരുന്നു.
കൽപ്പറ്റ അമ്പിലേരി യുകെ ബിൽഡിംഗ്, യെസ് ഭാരത് വെഡിംഗ് സെന്റർ, ഇമേജ് മൊബൈൽസ് എന്നിവിടങ്ങളിലാണ് ബിഗ് സ്‌ക്രീൻ സൗകര്യങ്ങൾ ഒരുക്കിയിരുന്നത്. ഓരോ സ്ഥലത്തും നൂറുകണക്കിനാളുകളാണ് കളികാണാനെത്തിയത്. മത്സരം കാണാൻ ഞായറാഴ്ച രാത്രി 10 മണിയോടെ തന്നെ ഫുട്‌ബോൾ ആരാധകർ ഇരിപ്പിടം ഉറപ്പിച്ചിരുന്നു.
കൈക്കുഞ്ഞുങ്ങളുമായി സ്ത്രീകൾ ഉൾപ്പെടെ കളി കാണാനെത്തിയതോടെ ആവേശം ഇരട്ടിയായി. കളി തുടങ്ങുന്നതിനു മുൻപു തന്നെ കാലുകുത്താൻ ഇടമില്ലാത്ത വിധം ആരാധകർ തടിച്ചുകൂടി. കൽപ്പറ്റ അമ്പിലേരി യുകെ ബിൽഡിംഗിൽ ഒരുക്കിയ ബിഗ് സ്‌ക്രീനിലാണ് കൂടുതൽ ജനക്കൂട്ടം എത്തിയത്. കളിയാവേശത്തിന്റെ ഭാഗമാകാൻ കൃഷി മന്ത്രി ടി സിദ്ദിഖും എത്തിയിരുന്നു. അർജന്റീന ആരാധകനായ മന്ത്രിയുടെ സാന്നിദ്ധ്യം അർജന്റീനയുടെ ആരാധകർക്ക് ആവേശം വർദ്ധിപ്പിച്ചു. എന്നാൽ മത്സരഫലം അനുകൂലമല്ലാതായതോടെ മത്സരം തീരുന്നതിനു മുൻപ് മന്ത്രിയും സംഘവും സ്ഥലംവിട്ടു.!
മത്സരഫലത്തിൽ അർജന്റീന ആരാധകർ നിരാശരാണെങ്കിലും ഫൈനലിൽ ആണല്ലോ പരാജയപ്പെട്ടതെന്ന ആശ്വാസത്തിലാണ് അവർ മടങ്ങിയത്. അതേസമയം രണ്ടാം കിരീടം ചൂടിയ സ്‌പെയിൻ ആരാധകർ പുലരുവോളം ആഘോഷമാക്കിയാണ് മടങ്ങിയത്.