പാലക്കാട്ട് അതിക്രൂര കൊലപാതകം; വൃദ്ധയെ ഡ്രമ്മിലിട്ട് കത്തിച്ചു, മൃതദേഹം ചാക്കിലാക്കി കുഴിച്ചുമൂടി, പ്രതിപ്പട്ടികയിൽ 17കാരനും

പാലക്കാട്: മോഷണത്തിനിടെ വൃദ്ധയെ തീയിട്ട് കൊലപ്പെടുത്തി കുഴിച്ചുമൂടി. പാലക്കാട് കൊഴിഞ്ഞാമ്പാറയിലാണ് സംഭവം. അട്ടയാമ്പതി സ്വദേശി സരസമ്മാളിനെയാണ് (66) പ്രദേശവാസികളായ യുവാക്കൾ ചേർന്ന് കൊലപ്പെടുത്തിയത്. സംഭവത്തിൽ ഒരാൾ പൊലീസിന്റെ പിടിയിലായിട്ടുണ്ട്.

ജൂൺ പത്ത് മുതൽ സരസമ്മാളിനെ കാണാനില്ലായിരുന്നു. തുടർന്ന് ജൂൺ 12ന് മകൾ പൊലീസിൽ പരാതി നൽകി. അന്വേഷണം നടക്കുന്നതിനിടെ സംശയം തോന്നിയ പൊലീസ് യുവാക്കളിലേക്കെത്തുകയായിരുന്നു. സ്വർണാഭരണങ്ങൾ മോഷ്‌‌ടിക്കാനാണ് പ്രതികൾ എത്തിയത്. കവർച്ചയ്‌ക്കിടെയായിരുന്നു കൊലപാതകം. ശേഷം മൃതദേഹം ശുചിമുറിയിലെ ഡ്രമ്മിലിട്ട് കത്തിച്ചു. പിന്നീട് പാതികത്തിയ ശരീരം ചാക്കിലാക്കി കുഴിച്ചുമൂടുകയായിരുന്നു. 17 വയസുകാരനും കൊലപാതകത്തിൽ പങ്കുണ്ടെന്നാണ് പിടിയിലായയാളുടെ മൊഴി. മറ്റ് പ്രതികൾക്കായുള്ള അന്വേഷണം ആരംഭിച്ചിട്ടുണ്ട്.