കൊല്ലത്ത് വിവാഹച്ചടങ്ങിനിടെ  യുവാക്കൾ  ചേരിതിരിഞ്ഞ്  ഏറ്റുമുട്ടി; ഇടപെടാനെത്തിയവർക്കും തല്ലുകിട്ടി

കൊല്ലം: വിവാഹച്ചടങ്ങിനിടെ യുവാക്കൾ ചേരിതിരിഞ്ഞ് ഏറ്റുമുട്ടി. കൊല്ലം മയ്യനാട് താന്നിയിൽ ഇന്നലെ രാത്രിയായിരുന്നു സംഭവം. കായലിനോട് ചേർന്നുള്ള ഓഡിറ്റോറിയത്തിലായിരുന്നു വിവാഹ സത്‌കാരം നടന്നത്. കായലിനരികിലിരുന്ന് മദ്യപിച്ച യുവാക്കൾ തമ്മിൽ തർക്കമുണ്ടാവുകയും ചേരിതിരിഞ്ഞ് തമ്മിൽത്തല്ലുകയുമായിരുന്നു.

താന്നി പാലത്തിന് സമീപത്തെ ബോട്ട് ജെട്ടിക്ക് സമീപവും കായലിലുമാണ് ഏറ്റുമുട്ടലുണ്ടായത്. ചിലർ കായലിൽ ഇറങ്ങിയും അടികൂടി. തർക്കം പരിഹരിക്കാനെത്തിയ നാട്ടുകാർക്കും വഴിയാത്രക്കാർക്കും മർദ്ദനമേറ്റു. നാട്ടുകാരിൽ ചിലർ വിവരമറിയിച്ചതിനെത്തുടർന്ന് പൊലീസ് സ്ഥലത്തെത്തിയപ്പോഴാണ് യുവാക്കൾ പിന്മാറിയത്.

തമ്മിൽത്തല്ലിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്. സംഭവത്തിൽ ഇരവിപുരം പൊലീസ് അന്വേഷണം നടത്തണമെന്ന് നാട്ടുകാർ ആവശ്യപ്പെട്ടു.