വെങ്ങാനൂരിൽ കാർ കത്തി മരിച്ചത് ഏറ്റുമാനൂർ സ്വദേശിയായ മുൻ സൈനികൻ, വീട്ടുകാരുമായി പിണങ്ങിയിറങ്ങിയെന്ന് വിവരം

തിരുവനന്തപുരം: വെങ്ങാനൂരിൽ ഓടിക്കൊണ്ടിരുന്ന കാറിന് തീപിടിച്ച് മരിച്ചയാളെ തിരിച്ചറിഞ്ഞു. ഇന്ന് പുലർച്ചെയായിരുന്നു സംഭവം. ഫയർഫോഴ്‌സ് സ്ഥലത്തെത്തി തീ പൂർണമായും കെടുത്തിയപ്പോഴാണ് കാറിൽ കത്തിക്കരിഞ്ഞ മൃതദേഹം കണ്ടെത്തിയത്. തുടർന്ന് നടത്തിയ അന്വേഷണത്തിലാണ് മരിച്ചത് ഏറ്റുമാനൂർ തെള്ളകം സ്വദേശിയായ ടൈറ്റസ് കുര്യനാണെന്ന് തിരിച്ചറിഞ്ഞത്. മുൻ സൈനികനായ ഇയാൾ ഞായറാഴ്‌ച രാത്രിയോടെ വീട്ടുകാരുമായി പിണങ്ങിയിറങ്ങിയതാണെന്നാണ് വിവരം.

വെങ്ങാനൂർ ജംഗ്‌ഷന് സമീപം അയ്യങ്കാളി സ്‌കൂളിനടുത്തുവച്ചാണ് കാർ കത്തുന്നത് കണ്ടത്. കെഎൽ 5 എവി 3686 എന്ന നമ്പരിലുള്ള റെനോ ക്വിഡ് കാറിന്റെ റോഡിന് നടുവിൽ വച്ച് കാറിന്റെ മുൻവശത്ത് റോഡിന് നടുവിൽവച്ച് തീപടരുകയും തുടർന്ന് കാർ റിവേഴ്‌സിൽ വന്ന് റോഡരികിലെ മതിലിനോട് ചേർന്ന് നിർത്തുകയുമായിരുന്നു. വാഹനം പൂ‌ർണമായും കത്തിയതോടെ ഷാസി നമ്പർ വച്ചാണ് വാഹന നമ്പർ മനസിലാക്കിയത്.