സ്റ്റുഡന്റ് ഹാർഡ്‌വെയർ ഹാക്കത്തോൺ സമാപിച്ചു

മാങ്ങാട്ടുപറമ്പ്: റോബോട്ടിക്സ് ആൻഡ് എഐ സ്റ്റാർട്ടപ്പായ യൂസിസോ സൊലൂഷൻസും കണ്ണൂർ ലിറ്റിൽ കൈറ്റ്സും, കണ്ണൂർ ഗവൺമെന്റ് എൻജിനീയറിംഗ് കോളേജിലെ ഇന്നവേഷൻ ആൻഡ് എന്റർപ്രണർഷിപ്പ് ഡെവലപ്‌മെന്റ് സെല്ലും കണ്ണൂർ എൻജിനീയറിംഗ് കോളേജിൽ സംഘടിപ്പിച്ച ജില്ലാതല സ്റ്റുഡന്റ് ഹാർഡ്‌വെയർ ഹാക്കത്തോൺ 'നിർമിതി 2026' ഗ്രാൻഡ് ഫൈനൽ സമാപിച്ചു. എട്ട്, ഒമ്പത്, 10 ക്ലാസുകളിലെ 50 വിദ്യാർത്ഥികളാണ് ഗ്രാൻഡ് ഫൈനലിൽ മാറ്റുരച്ചത്. സമാപന സമ്മേളനം ടി.കെ ഗോവിന്ദൻ എം.എൽ.എ ഉദ്ഘാടനം ചെയ്ത് സമ്മാനദാനം നിർവഹിച്ചു. ഫാക്കൽറ്റി അഡ്വൈസർ വി.വി മുഹമ്മദ് അനീസ് അദ്ധ്യക്ഷനായി. എൻജിനീയറിംഗ് കോളേജ് പ്രിൻസിപ്പൽ ഡോ. സി ശ്രീകുമാർ മുഖ്യാതിഥിയായി. ലിറ്റിൽ കൈറ്റ്സ് ജില്ലാ കോ ഓഡിനേറ്റർ സിന്ധു അറക്കൽ സംസാരിച്ചു. സ്റ്റുഡന്റ് ലീഡുമാരായ ആൻസിയ മനോജ് സ്വാഗതവും എ.വി അഭിരാമൻ നന്ദിയും പറഞ്ഞു.