ന്യൂസിലൻഡിനെതിരായ പരമ്പരയിൽ നിന്ന് പന്തിനെ ഒഴിവാക്കി, പകരക്കാരനായി മറ്റൊരു താരത്തെ നിയമിച്ച് ബിസിസിഐ

ന്യൂഡൽഹി: ന്യൂസിലൻഡിനെതിരായ ഇന്ത്യ എ ടീമിന്റെ ആദ്യ രണ്ട് മത്സരങ്ങളിൽ നിന്ന് വിക്കറ്റ് കീപ്പർ ബാറ്റർ റിഷഭ് പന്തിനെ ഒഴിവാക്കി ബിസിസിഐ. ഇടതുവശത്തെ പേശിവലിവിനെ തുടർന്ന് പന്തിന് വിശ്രമം അനുവദിക്കുന്നതിനായാണ് ടീമിൽ നിന്നും ഒഴിവാക്കിയത്. പകരക്കാരനായി യുവ വിക്കറ്റ് കീപ്പർ ബാറ്റർ കുമാർ കുശാഗ്രയെ ടീമിൽ ഉൾപ്പെടുത്തിയതായി ബിസിസിഐ അറിയിച്ചു. ഇറാനി കപ്പിൽ ജമ്മു കാശ്‌മീരിനെതിരായ മത്സരത്തിൽ റെസ്റ്റ് ഓഫ് ഇന്ത്യയെ നയിക്കുന്നതിനിടെ പന്തിന് വൈറൽ പനി ബാധിച്ചിരുന്നു. ഇതിന് പിന്നാലെയാണ് പരിക്കിന്റെ പ്രശ്നവും ഉയർന്നത്. പന്തിന്റെ ആരോഗ്യനില ബിസിസിഐ മെഡിക്കൽ സംഘം നിരീക്ഷിച്ചുവരികയാണെന്ന് സെക്രട്ടറി ദേവജിത് സൈകിയ അറിയിച്ചു.

അതേസമയം, ഒക്ടോബർ ഏഴിന് ന്യൂസിലൻഡിലെ ലിങ്കണിൽ ആരംഭിക്കുന്ന മൂന്നാം മത്സരത്തിൽ പന്ത് കളിക്കുമോയെന്ന കാര്യത്തിൽ പിന്നീട് തീരുമാനമെടുക്കുമെന്നും സൈകിയ വ്യക്തമാക്കി. ഝാർഖണ്ഡിൽ നിന്നുള്ള 21കാരനായ കുശാഗ്ര ഓസ്‌ട്രേലിയ എയ്‌ക്കെതിരായ ഇന്ത്യ എയുടെ റെഡ് ബോൾ മത്സരങ്ങളിൽ മികച്ച പ്രകടനം കാഴ്ചവച്ചിരുന്നു. ആദ്യ മത്സരത്തിൽ 113, 46 എന്നിങ്ങനെയാണ് താരത്തിന്റെ സ്കോർ. രണ്ടാം മത്സരത്തിൽ 10, 1 എന്നിങ്ങനെയായിരുന്നു സ്‌കോർ.

ധ്രുവ് ജുറേൽ നയിക്കുന്ന ഇന്ത്യ എ ടീമിൽ യശസ്വി ജയ്സ്വാൾ, കെ.എൽ. രാഹുൽ, ബി. സായ് സുദർശൻ, വാഷിംഗ്ടൺ സുന്ദർ, ആകാശ് ദീപ്, മുകേഷ് കുമാർ തുടങ്ങിയ താരങ്ങളെ ഉൾപ്പെടുത്തിയിട്ടുണ്ട്. ന്യൂസിലൻഡിനെതിരായ ഇന്ത്യ എയുടെ പരമ്പര ഇരുടീമുകൾക്കും ടെസ്റ്റ് പരമ്പരയ്ക്കുള്ള ഒരുക്കത്തിൽ നിർണായകമാണ്. വെല്ലിംഗ്ടണിലും ക്രൈസ്റ്റ് ചർച്ചിലുമായി നടക്കുന്ന രണ്ട് ടെസ്റ്റുകൾക്ക് മുന്നോടിയായുള്ള പരിശീലന പരമ്പരയാണിത്.

ഇന്ത്യ എ ടീം: ധ്രുവ് ജുറേൽ (ക്യാപ്ടൻ, വിക്കറ്റ് കീപ്പർ), യശസ്വി ജയ്സ്വാൾ, കെ.എൽ. രാഹുൽ, ദേവ്ദത്ത് പടിക്കൽ, രവിച്ചന്ദ്രൻ സ്മരൺ, വാഷിംഗ്ടൺ സുന്ദർ, ഔഖീബ് നബി, ആകാശ് ദീപ്, അൻഷുൽ കാംബോജ്, മാനവ് സുതാർ, മുകേഷ് ചൗധരി, ബി. സായ് സുദർശൻ, യാഷ് റാത്തോഡ്, മുകേഷ് കുമാർ, കുമാർ കുശാഗ്ര (വിക്കറ്റ് കീപ്പർ -ആദ്യ രണ്ട് മത്സരങ്ങൾ).