തുറവൂരിൽ കടത്തിണ്ണയിൽ കിടന്നയാളെ വെട്ടിക്കൊലപ്പെടുത്തിയ പ്രതിക്ക്​ ജീവപര്യന്തം

ആലപ്പുഴ: തുറവൂരിൽ കടത്തിണ്ണയിൽ കിടന്നുറങ്ങിയ തമിഴ്​നാട്​ സ്വദേശിയെ വെട്ടിക്കൊലപ്പെടുത്തിയ കേസിലെ പ്രതിക്ക്​ ജീവപര്യന്തം തടവും പിഴയും. തുറവൂർ പഞ്ചായത്ത്​ ഏഴാംവാർഡ്​ വികാരത്തിൽ പുത്തൻതറ കിഴക്കേ നികാരത്തിൽ വീട്ടിൽ ഉണ്ണികൃഷ്ണനെയാണ്​ (44) ആലപ്പുഴ അഡീഷണൽ ജില്ല സെഷൻസ്​ കോടതി-രണ്ട്​ ജഡ്ജി ബിന്ദു സുധാകരൻ ശിക്ഷിച്ചത്​.

തമിഴ്നാട് കടലൂർ ജില്ലയിൽ വിരുതാചലം താലൂക്കിൽ സാത്തുകുടൽ വില്ലേജിൽ സ്ട്രീറ്റ്കോളനിയിൽ പഴനിവേലിനെ (52) കൊലപ്പെടുത്തിയ കേസിലാണ്​ ശിക്ഷ.

2024 ആഗസ്റ്റ്​ എട്ടിന്​ രാത്രിയായിരുന്നു സംഭവം. തുറവൂർ ക്ഷേത്രത്തിന്​ വടക്കുവശത്തെ കടത്തിണ്ണയിലാണ്​ പഴനിവേൽ സ്ഥിരമായി കിടന്നുറങ്ങിയിരുന്നത്​. ആ സ്ഥലത്തുനിന്ന്​ മാറണമെന്ന്​ ആവശ്യപ്പെട്ട്​ തെങ്ങുകയറ്റത്തൊളിലാളിയായ പ്രതി, പഴനിവേലിനെ ഉപദ്രവിച്ചശേഷം സഞ്ചിയിൽ കരുതിയിരുന്ന വെട്ടരിവാൾ ഉപയോഗിച്ച്​ വെട്ടിക്കൊലപ്പെടുത്തുകയായിരുന്നു. കുത്തിയതോട്​ പൊലീസ്​ അന്നുതന്നെ പ്രതിയെ പിടികൂടിയിരുന്നു. കുത്തിയതോട് പൊലീസ്​ ഇൻസ്​പെക്ടർ അജയമോഹനനാണ് കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി അഡീഷനൽ പബ്ലിക്ക് പ്രോസിക്യൂട്ടർ എസ്​.എ.ശ്രീമോൻ ഹാജരായി. പ്രോസിക്യൂഷൻ നടപടികൾക്ക്​ സിവിൽ സി.പി.ഒ മാരായ മാത്യു, ആൻസൺ എന്നിവർ നേതൃത്വം നൽകി.