കേരളത്തിൽ ബദൽ രാഷ്ട്രീയശക്തിയായി ബി.ജെ.പി വളരും: കുമ്മനം രാജശേഖരൻ

​​കൊല്ലം: കേരളത്തിൽ ഇടത് -വലത് മുന്നണികൾക്ക് ബദലായി, രാഷ്ട്രീയ പൂർണതയുള്ള പാർട്ടിയായി ബി.ജെ.പി സമീപഭാവിയിൽ മാറുമെന്ന് ബി.ജെ.പി ദേശീയ നിർവാഹക സമിതി അംഗം കുമ്മനം രാജശേഖരൻ. കുണ്ടറ മണ്ഡലം കമ്മിറ്റിയുടെ നേതൃത്വത്തിൽ കല്ലറയ്ക്കൽ ഹാളിൽ സംഘടിപ്പിച്ച 'ദീനദയാൽ ഉപാദ്ധ്യായ പ്രശിക്ഷൻ അഭിയാൻ' ഉദ്ഘാടനം ചെയ്യുകയായിരുന്നു അദ്ദേഹം.

​കേരളം മാറി മാറി ഭരിച്ച മുന്നണികൾ ഇന്ന് അണികളെ പിടിച്ചുനിറുത്താൻ പാടുപെടുകയാണ്. ആശയദാരിദ്ര്യം അണികളെ പാർട്ടികളിൽ നിന്ന് അകറ്റിയിരിക്കുന്നു. രാജ്യത്തുടനീളം ബി.ജെ.പി നടപ്പാക്കുന്ന വികസന പ്രവർത്തനങ്ങളിൽ ആകൃഷ്ടരായി പലരും ബി.ജെ.പിയിലേക്ക് വരാൻ സന്നദ്ധരായിരിക്കുകയാണ്.

​കേരളത്തിൽ പാർട്ടി കൂടുതൽ ശക്തിപ്പെടുത്തുന്നതിനായി പ്രവർത്തകർ കഠിനമായി പരിശ്രമിക്കണം. സാധാരണക്കാരുടെ പ്രശ്നങ്ങൾ ഏറ്റെടുത്ത് പൊതുസമൂഹത്തിൽ സ്വീകാര്യത വർദ്ധിപ്പിക്കണം. ബി.ജെ.പിക്ക് കേരളത്തിൽ മുന്നേറ്റമുണ്ടാക്കാൻ പരിശ്രമം നിരന്തരം തുടരണമെന്നും അദ്ദേഹം പറഞ്ഞു.

​മണ്ഡലം പ്രസിഡന്റ് സച്ചു പ്രസാദ് അദ്ധ്യക്ഷനായി. സംസ്ഥാന സമിതി അംഗം വെള്ളിമൺ ദിലീപ്, മണ്ഡലം പ്രഭാരി നെടുമ്പന ശിവൻ, ജില്ലാ വൈസ് പ്രസിഡന്റ് സുനിൽകുമാർ, മീഡിയ ജില്ലാ കൺവീനർ പ്രതിലാൽ, നിയോജകമണ്ഡലം ജനറൽ സെക്രട്ടറിമാരായ സുരേഷ് കുമാർ, ഗിരീഷ് എന്നിവർ സംസാരിച്ചു.