2027 സെൻസസ്: ആദ്യം പൂർത്തിയാക്കി കരുനാഗപ്പള്ളി നഗരസഭ

കരുനാഗപ്പള്ളി : മികച്ച ഭരണനിർവഹണത്തിന്റെയും തദ്ദേശീയ ഏകോപനത്തിന്റെയും മികവിൽ 2027-ലെ സെൻസസിന്റെ ഹൗസ് ലിസ്റ്റിംഗ് ആൻഡ് ഹൗസിംഗ് സെൻസസ് പ്രഥമ ഘട്ടം കൊല്ലം ജില്ലയിൽ ഏറ്റവും ആദ്യം പൂർത്തിയാക്കുന്ന നഗരസഭയായി കരുനാഗപ്പള്ളി മാറി. നിശ്ചയിച്ച സമയപരിധിക്ക് മുൻപ് തന്നെ ഈ ഡാറ്റ ശേഖരണം 100 ശതമാനം വിജയകരമായി പൂർത്തിയാക്കിയതായി നഗരസഭാ ചെയർപേഴ്സൺ പി.സോമരാജൻ അറിയിച്ചു.

 75 എനൂമറേറ്റർമാർ; 12 സൂപ്പർവൈസർമാർ

• നഗരസഭയിലെ 37 ഡിവിഷനുകളിലായി വ്യാപിച്ചുകിടക്കുന്ന 77 ഹൗസ് ലിസ്റ്റിംഗ് ബ്ലോക്കുകളിലാണ് വിവരശേഖരണം നടന്നത്.
• നിശ്ചിത സമയക്രമത്തിനുള്ളിൽ തന്നെ 75 എനൂമറേറ്റർമാരും 12 സൂപ്പർവൈസർമാരും അടങ്ങുന്ന സംഘം ഈ ലക്ഷ്യം കൈവരിച്ചു.
• 37 വാർഡുകളിലെയും ഓരോ വീടുകളും കൃത്യമായി രജിസ്റ്റർ ചെയ്തിട്ടുണ്ടെന്ന് ഉറപ്പുവരുത്തിയ ഈ കൂട്ടായ പ്രവർത്തനം ദേശീയതലത്തിലുള്ള ഭരണപരമായ ഡാറ്റ ശേഖരണത്തിൽ നഗരസഭയ്ക്ക് മികച്ച നേട്ടമാണ് സമ്മാനിച്ചത്.

 ഏകോപന മികവുമായി ഉദ്യോഗസ്ഥ സംഘം

സെൻസസ് ചാർജ് ഓഫീസറും നഗരസഭാ സെക്രട്ടറിയുമായ സന്ദീപ് കുമാർ വി.എസ്., അസിസ്റ്റന്റ് സെക്രട്ടറിയും സെൻസസ് നോഡൽ ഓഫീസറുമായ ഫെമി എസ്., സെൻസസ് ചാർജ് ക്ലർക്ക് മിൽഹാൻ എസ്., ടെക്നിക്കൽ അസിസ്റ്റന്റ് ജെറി ചാൾസ് എന്നിവരുടെ നേതൃത്വത്തിലാണ് പ്രവർത്തനങ്ങൾ ഏകോപിപ്പിച്ചത്. ഫീൽഡ് ഉദ്യോഗസ്ഥരുടെയും മുനിസിപ്പൽ മാനേജ്‌മെന്റിന്റെയും മികച്ച കൂട്ടായ്മയാണ് പ്രാരംഭ ഘട്ടം തടസ്സങ്ങളൊന്നുമില്ലാതെ വിജയകരമായി പൂർത്തിയാക്കാൻ സഹായിച്ചത്. സെൻസസിന്റെ അടുത്ത ഘട്ടം 2027 ഫെബ്രുവരിയിൽ ആരംഭിക്കും.