'ഈ വേദന സഹിക്കാവുന്നതിനപ്പുറം, മുറിവുണങ്ങാൻ സമയമെടുക്കും'; ആദ്യ പ്രതികരണവുമായി ലയണൽ മെസി

ന്യൂയോർക്ക്: ഫൂട്ബോൾ ലോകകപ്പ് ഫൈനലിൽ സ്‌പെയിനോട് പരാജയപ്പെട്ടതിനുപിന്നാലെ ആദ്യമായി പ്രതികരിച്ച് അർജന്റീനിയൻ താരം ലയണൽ മെസി. തോൽവിയുടെ വേദന വളരെ ആഴത്തിലുള്ളതാണെങ്കിലും തുടർച്ചയായി രണ്ട് തവണ ഫൈനലിലെത്തിയ ടീമിന്റെ പോരാട്ടവീര്യത്തിൽ അഭിമാനമുണ്ടെന്ന് മെസി പറഞ്ഞു.

'ഈ വേദന അതിരില്ലാത്തതാണ്. ഈ മുറിവുണങ്ങാൻ സമയമെടുക്കും. എന്നാൽ, നല്ല ഓർമ്മകളെയും ഞാൻ മുറുകെപ്പിടിക്കുന്നു. ഞങ്ങൾ തിരിച്ചുവന്ന മത്സരങ്ങളും അവസാന നിമിഷംവരെ എല്ലാം നൽകിയ പോരാട്ടങ്ങളും എന്നും മനസിൽ നിലനിൽക്കും. ഒരു രാജ്യത്തിന്റെ മുഴുവൻ പിന്തുണയും ഈ ടീമിന്റെ കഠിനാദ്ധ്വാനവും സമർപ്പണവും കൊണ്ടാണ് ലോകത്തിലെ ഏറ്റവും മികച്ച ടീമുകളിലൊന്നാകാൻ കഴിഞ്ഞത്. ഞങ്ങൾ കൈവരിച്ച നേട്ടങ്ങളെ പൂർണമായി വിലയിരുത്താൻ ഇന്ന് പ്രയാസമാണ്. എന്നാൽ, ഞങ്ങൾ തുടർച്ചയായി രണ്ട് തവണ ലോകകപ്പ് ഫൈനലുകളിലെത്തി'- മെസി സോഷ്യൽ മീഡിയയിൽ കുറിച്ചു. ലോകകപ്പ് കിരീടം നേടിയ സ്‌പെയിനിനെ അഭിനന്ദിക്കാനും മെസി മറന്നില്ല. അർജന്റീനക്കാരനായിരിക്കുന്നതിൽ അളവറ്റ അഭിമാനം തോന്നുന്നതായും മെസി കൂട്ടിച്ചേർത്തു.

ഞായറഴ്‌ച നടന്ന ആവേശകരമായ ഫൈനലിന്റെ 106-ാം മിനിറ്റിൽ ഫെറാൻ ടോറസ് നേടിയ ഏക ഗോളാണ് സ്‌പെയിനിന് വിജയകിരീടം സമ്മാനിച്ചത്. ഇതോടെ സ്‌പെയിനിന്റെ ചരിത്രത്തിലെ രണ്ടാം ലോകകപ്പ് കിരീടമാണിത്. മത്സരത്തിലുടനീളം മെസിക്ക് ലക്ഷ്യത്തിലേക്ക് ഒരൊറ്റ ഷോട്ടുപോലും തൊടുക്കാനായില്ല. ഇതോടെ കിരീടം നിലനിർത്തുകയെന്ന അർജന്റീനിയയുടെ സ്വപ്‌നം തകർന്നുവീഴുകയായിരുന്നു.