പുതുക്കുളങ്ങര ക്ഷേത്രത്തിലെ പുനഃപ്രതിഷ്ഠാ വാർഷികാഘോഷം സമാപിച്ചു

ഓതറ: പുതുക്കുളങ്ങര ദേവി ക്ഷേത്രത്തിലെ പുനഃപ്രതിഷ്ഠാ വാർഷിക മഹോത്സവത്തോടനുബന്ധിച്ചുള്ള ചടങ്ങുകൾ ഭക്തിസാന്ദ്രമായി. ക്ഷേത്രത്തിലെ പ്രത്യേക പൂജകൾക്കും ചടങ്ങുകൾക്കും തന്ത്രി താഴമൺമഠം കണ്ടരര് ബ്രഹ്മദത്തൻ രാജീവരര് മുഖ്യകാർമ്മികത്വം വഹിച്ചു. പുനഃപ്രതിഷ്ഠാ വാർഷികത്തോടനുബന്ധിച്ച് ക്ഷേത്രസന്നിധിയിൽ പുലർച്ചെ വെള്ളിക്കുംഭത്തിൽ കളഭം നിറച്ച് കലശപൂജയോടെ ആരംഭിച്ച ലക്ഷാർച്ചന ചടങ്ങുകൾ ലക്ഷം മന്ത്രജപം പൂർത്തിയാക്കി വൈകിട്ട് ദീപാരാധനയോടെ കളഭാഭിഷേകത്തോടെ സമാപിച്ചു. ക്ഷേത്രത്തിൽ ഉച്ചപൂജയോടനുബന്ധിച്ച് നവകാഭിഷേകവും തുടർന്ന് അന്നദാനവും നടന്നു. വൈകിട്ട് ദീപാരാധനയും അത്താഴപൂജയും ഭക്തിനിർഭരമായ അന്തരീക്ഷത്തിൽ നടന്നു. തുടർന്ന് ക്ഷേത്രസന്നിധിയിൽ വാദ്യശ്രീ തൃക്കാരിയൂർ മനോജിന്റെ പ്രമാണിത്വത്തിൽ പഞ്ചവാദ്യ വിസ്മയം അരങ്ങേറി.