മനുഷ്യ-വന്യജീവി സംഘർഷം: ചികിത്സാസഹായവും നഷ്ടപരിഹാരവും 25 % കൂട്ടി

തിരുവനന്തപുരം:മനുഷ്യ-വന്യജീവി സംഘർഷങ്ങളിൽ മരണപ്പെടുന്നവരുടെ ആശ്രിതർക്കും സ്ഥിരമായ അംഗവൈകല്യങ്ങൾ സംഭവിക്കുന്നവർക്കും പരിക്കേൽക്കുന്നവർക്കുമുളള നഷ്ടപരിഹാരവും ചികിത്സാധനസഹായവും 25ശതമാനം വർദ്ധിപ്പിച്ച് സർക്കാർ ഉത്തരവായി. വന്യജീവി ആക്രമണത്തിൽ കൃഷിനാശത്തിനുള്ള നഷ്ടപരിഹാരം ഇരട്ടിയാക്കിയ ഉത്തരവ് കഴിഞ്ഞദിവസം വനംവകുപ്പ് പുറത്തിറക്കിയിരുന്നു.

ധനസഹായങ്ങൾ:

വന്യജീവി ആക്രമണത്തിലുളള മരണത്തിന് നിലവിലുള്ള 14ലക്ഷം രൂപ, 17.5ലക്ഷം രൂപയായി വർദ്ധിപ്പിച്ചു.

പാമ്പ്, തേനീച്ച, കടന്നൽ എന്നിവയുടെ ആക്രമണം മൂലമുള്ള മരണത്തിനുണ്ടായിരുന്ന 4ലക്ഷം രൂപ, 5ലക്ഷം രൂപയാക്കി.

40%മുതൽ 60%വരെ അംഗവൈകല്യം സംഭവിച്ചാൽ രണ്ട് ലക്ഷം രൂപയായിരുന്നത് 2.5ലക്ഷം രൂപയാക്കി.

60ശതമാനത്തിലധികം അംഗവൈകല്യം സംഭവിച്ചാൽ 2,50,000 രൂപയായിരുന്നത് 3,12,500രൂപയാക്കി.

ആശുപത്രിവാസം ആവശ്യമുളള പരിക്കുകൾക്ക് ഗുരുതരാവസ്ഥ അനുസരിച്ച് 1,25,000 രൂപ വരെ ലഭിക്കും. ഒരാഴ്ചയ്ക്ക് മുകളിൽ ആശുപത്രിവാസമുളള ഗുരുതരപരിക്കുകൾക്ക് ഒരു ലക്ഷം രൂപ വരെ. അതീവഗുരുതരമായി പരിക്കേൽക്കുന്നവർക്കും ദീർഘകാലംചികിത്സ വേണ്ടിവരുന്നവർക്കും ചികിത്സിക്കുന്ന ഡോക്ടറുടെ സർട്ടിഫിക്കറ്റിന്റെ അടിസ്ഥാനത്തിൽ, ചെലവായ യഥാർത്ഥതുക സി.എം.ഡി.ആർ.എഫിൽ നിന്നും അനുവദിക്കും.