കോടതിപ്പാലം- ഔട്ട്പോസ്റ്റ് റോഡിൽ യാത്ര ദുഷ്കരം

ആലപ്പുഴ: വെള്ളവും ചെളിയും നിറഞ്ഞ റോഡ്. രാത്രിയിലാകട്ടെ വെളിച്ചവുമില്ല. കോടതിപ്പാലം മുതൽ ഔട്ട് പോസ്റ്റ് വരെയുള്ള റോഡിലാണ് മഴ പെയ്തതോടെ യാത്ര ദുരിതമായി മാറിയത്. കടന്നുപോകുന്ന വാഹനങ്ങൾക്കിടയിലൂടെ വെള്ളക്കെട്ടില്ലാത്ത സ്ഥലം നോക്കി നടക്കേണ്ട ഗതികേടിലാണ് യാത്രക്കാർ. വെളിച്ചമില്ലാത്തതിനാൽ തെന്നിവീണും ചെളിയിൽ ചവിട്ടിയുമാണ് പലരും ഈ റോഡ് താണ്ടിയെത്തുന്നത്.

കോടതിപ്പാലം നിർമ്മാണത്തിന്റെ ഭാഗമായി വൈദ്യുതി ലൈനുകൾ മാറ്റി സ്ഥാപിച്ചിരുന്നു. കനാലിന്റെ മറുകരയിലെ മിനി സിവിൽ സ്റ്രേഷനിൽ നിന്നുള്ള അരണ്ട വെളിച്ചംമാത്രമാണ് രാത്രിയിൽ ഈ ഭാഗത്ത് ഏക ആശ്രയം. രാത്രികാലങ്ങളിൽ വാഹനങ്ങളുടെ ലൈറ്റുകളുടെ പ്രകാശത്തെ ആശ്രയിച്ചാണ് പലരും നടക്കുന്നത്. പാലം നിർമ്മാണം നടക്കുന്നതിനാൽ റോഡ് അറ്റകുറ്റപ്പണി സാദ്ധ്യമല്ലെങ്കിലും വെളിച്ചം ഒരുക്കാനുള്ള നടപടിയെങ്കിലും വേണമെന്നാണ് യാത്രക്കാരുടെ ആവശ്യം.

വൈ.എം.എസി.എ, മുല്ലക്കൽ ഭാഗങ്ങളിൽ നിന്ന് കെ.എസ്.ആർ.ടി.സി സ്റ്റാൻഡിലേക്ക് എത്തുന്നതിനുള്ള എളുപ്പമാർഗംകൂടിയാണ് ഈ റോഡ്

വെള്ളവും ചെളിയും, വെളിച്ചവുമില്ല

 മഴക്കാലമായതിനാൽ യാത്രക്കാരുടെ സുരക്ഷ മുൻനിറുത്തി നിർമ്മാണ കമ്പനിയോ നഗരസഭയോ അടിയന്തിരമായി തെരുവ് വിളക്ക് സ്ഥാപിക്കണം

 എതിരെ വാഹനം വന്നാൽ ഒതുങ്ങി നിൽക്കാൻ പോലും സ്ഥലമില്ലാത്ത റോഡിലൂടെയുള്ള യാത്ര വലിയ ബുദ്ധിമുട്ടാണ്

 രണ്ടര മീറ്ററോളം വീതിയേ റോഡിനുള്ളൂ. പൈപ്പിടാൻ കുഴിയിട്ട ഭാഗത്ത് മഴ പെയ്തതോടെ കുഴിയും രൂപപ്പെട്ടു

 പുതിയതായി നിർമ്മിച്ച മൃഗാശുപത്രിമുതൽ ചെത്തുതൊഴിലാളി യൂണിയൻ ഓഫീസ് വരെയുള്ള സർവീസ് റോഡ‌ിലും യാത്ര വലിയ ബുദ്ധിമുട്ടാണ്

വെളിച്ചമില്ലാത്തതിനാൽ രാത്രികാലങ്ങളിൽ റോഡിലൂടെയുള്ള യാത്ര വലിയ ബുദ്ധിമുട്ടാണ്. കഴിഞ്ഞ ദിവസങ്ങളിൽ ഈ പരിസരത്ത് നിന്ന് മലമ്പാമ്പിനെ പിടിച്ചതുമുതൽ വലിയ ഭയമാണ്. വെളിച്ചം ഉറപ്പ് വരുത്താൻ അധികൃതർ തയ്യാറാവണം

-ആതിര, സെയിൽസ് ഗേൾ, മുല്ലയ്ക്കൽ